Árið 2023 voru að jafnaði um 226.900 manns á vinnumarkaði samkvæmt vinnumarkaðsrannsókn. Af þeim voru rúmlega 219.300 starfandi og um 7.600 án vinnu og í atvinnuleit. Atvinnuþátttaka mældist 80,5%, hlutfall starfandi af mannfjölda 77,8% og atvinnuleysi var 3,4%. Atvinnulausum fækkaði um rúmlega 500 manns frá árinu 2022 og atvinnuleysið dróst saman um 0,4 prósentustig á milli ára. Atvinnuleysi á meðal kvenna var 2,9% að jafnaði og á meðal karla var það 3,8%. Árið 2023 var atvinnuleysi að jafnaði 4,6% í Reykjavík, 3,0% í nágrenni Reykjavíkur og 2,3% utan höfuðborgarsvæðisins.
Áætlað er að af öllum starfandi hafi konur verið að jafnaði um 100.100 allt árið 2023 og karlar um 119.200. Ekki var nægjanlegur fjöldi í úrtaki vinnumarkaðsrannsóknar til að greina fjölda kynsegin/annað en samkvæmt talningu úr staðgreiðslugögnum voru 72 kynsegin/annað (skráð samkvæmt þjóðskrá) starfandi að jafnaði allt árið 2023.
Heildarvinnustundir þeirra sem voru við vinnu í viðmiðunarvikunni voru að meðaltali 36,4 klukkustundir á viku árið 2023. Heildarvinnustundir kvenna á viku voru 32,5 klukkustundir og karla 39,6 klukkustundir. Fólk utan höfuðborgarsvæðisins vinnur að jafnaði fleiri vinnustundir á viku en þeir sem búa á höfuðborgarsvæðinu. Meðalfjöldi vinnustunda fólks í Reykjavík árið 2023 var 35,2 klukkustundir, hjá íbúum nágrennis Reykjavíkur voru stundirnar að jafnaði 35,8 en íbúar utan höfuðborgarsvæðisins unnu að jafnaði 38,2 klukkustundir.
Þróun menntunar og starfandi einstaklinga yfir 20 ára tímabil sýnir að hlutfall háskólamenntaðra á vinnumarkaði hefur aukist mjög eða úr 24,2% í 40,8% allra starfandi á íslenskum vinnumarkaði samkvæmt vinnumarkaðsrannsókn. Á sama tíma hefur hlutfall þeirra sem aðeins hafa lokið grunnmenntun dregist verulega saman. Hlutur þeirra sem hafa lokið starfs- og/eða framhaldsmenntun að einhverju leyti hefur staðið í stað.
Sá hópur sem einna erfiðast hefur verið að fjalla um í niðurstöðum Vinnumarkaðsrannsóknar eru innflytjendur og hefur hann frá upphafi verið verulega vanmetinn í niðurstöðum rannsóknarinnar. Svarhlutfall eftir uppruna sýnir það svo ekki verður um villst. Hlutfall innflytjenda af mannfjölda hefur aukist verulega síðustu ár en á sama tíma hefur svarhlutfall hópsins í rannsókninni (og reyndar öðrum úrtaksrannsóknum Hagstofunnar) dregist verulega saman. Árið 2003 voru 683 innflytjendur í endanlegu úrtaki rannsóknarinnar eða 4,5% og 408 svöruðu eða 3,2% af gildum svörum. Í samanburði við árið 2023 þá voru innflytjendur 4.393 í úrtaki eða 22,5% og 877 svöruðu eða 8,7% af gildum svörum.
Áréttað skal að Vinnumarkaðsrannsókn gefur áreiðanlegar niðurstöður um heildina eða hópa eins og kyn, aldur, búsetu eða menntun. Hins vegar hentar rannsóknin ein og sér verr til greininga á innflytjendum á vinnumarkaði og hætt er við að niðurstöður gefi ekki rétta mynd. Af þeim sökum birtir Hagstofan hér upplýsingar um þennan hóp sem fengnar eru úr annarri gagnalind eins og gert er hér að ofan með kynsegin fólk.
Á myndinni hér að neðan má sjá þá sem teljast starfandi samkvæmt staðgreiðslugögnum Hagstofunnar á aldrinum 16 til 74 ára með lögheimili á Íslandi. Eins og myndin sýnir hefur hlutfall starfandi innflytjenda á íslenskum vinnumarkaði meira en fjórfaldast á árunum 2003 til 2023, úr 5,1% allra í vinnu í 23,0%. Innflytjandi er einstaklingur með lögheimili á Íslandi sem er fæddur erlendis og á foreldra, afa og ömmur sem öll eru fædd erlendis.